Стэнфордын их сургуультай Харилцан ойлголцлын санамж бичиг байгууллаа

Монгол-Германы хамтарсан ашигт малтмал, технологийн их сургуулийн Ректор Проф. Б.Батцэнгэл болон АНУ-ын Стэнфордын их сургуулийн Профессор Жеф Каэрс нар тус хоёр их сургуулийн хамтын ажиллагааны Харилцан ойлголцлын санамж бичгийг байгууллаа. 

Хоёр их сургууль нь санамж бичгийн хүрээнд сургалт, судалгааны туршлага мэдээлэл солилцох, холбогдох салбарт хамтарсан судалгааны төсөл хэрэгжүүлэх, их сургуулийн кампус ашиглалт, оюутан болоод багш судлаачдын солилцооны хөтөлбөр хэрэгжүүлэх зэрэг хэд хэдэн чиглэлээр хамтран ажиллахаар тусгажээ. Ийнхүү Санамж бичиг байгуулах уулзалтад УИХ-ын гишүүн А.Ундраа, МГТИС-ийн Хүрээлэн буй орчны профессор Г.Гантуяа болон бусад төлөөлөл оролцлоо.

Профессор Жеф Каэрс нь тус их сургуулийн Геофизик, дэлхий, гариг эрхсийн шинжлэх ухааны профессор төдийгүй Геофизикийн тэнхимд хүндэт профессорын үүрэг гүйцэтгэж байгаа юм. Тэрээр Монголд айлчлах хугацаандаа МГТИС-ийн хотхонд зочлон оюутан залууст зориулан "AI ба Өгөгдлийн шинжлэх ухаан: Тогтвортой уул уурхайн дэлхийн чиг хандлага ба Монгол улсын боломжууд" сэдвээр илтгэл тавьсан билээ.