Стэнфордын их сургуулийн профессор Жеф Каэрс оюутнуудад лекц уншлаа

Монгол-Германы хамтарсан ашигт малтмал, технологийн их сургуульд АНУ-ын Стэнфордын их сургуулийн Геофизик, дэлхий, гариг эрхсийн шинжлэх ухааны профессор Жеф Каэрс, УИХ-ын гишүүн А.Ундраа, Б.Уянга нарын хамт зочилж, МГТИС-ийн удирдлагууд, багш мэргэжилтнүүдийн төлөөлөлтэй уулзлаа. Уулзалтад профессор Жеф Каэрс одоогийн хэрэгжүүлж буй судалгааны ажлынхаа талаар танилцуулахын зэрэгцээ тус хоёр их сургуулийн цаашдын хамтын ажиллагааны талаар санал солилцсон юм.

Уулзалтын дараа тэрээр оюутнуудад "AI ба Өгөгдлийн шинжлэх ухаан: Тогтвортой уул уурхайн дэлхийн чиг хандлага ба Монгол улсын боломжууд" сэдвээр илтгэл тавьж, оролцогчидтой сонирхолтой яриа өрнүүллээ. Илтгэл нь уул уурхай дахь хиймэл оюун ухаан ба өгөгдлийн шинжлэх ухааны нөлөөг харуулж, Монголын уул уурхайн салбарын ирээдүйд ямар боломжууд байгааг онцолсон байв.

Профессор Жеф Каэрсийн судалгааны чиглэл нь тодорхойгүй нөхцөлд шийдвэр гаргах, 100 хувийн сэргээгдэх эрчим хүч рүү шилжихэд шаардлагатай геотермал эрчим хүч болон чухал эрдэс баялгийн тогтвортой хангамжийг хөгжүүлэхэд чиглэсэн. Мөн тэрээр Mineral-X олон улсын санаачилгыг үүсгэн байгуулсан бөгөөд энэ нь дэлхийн эрдэс баялгийн тогтвортой, хариуцлагатай ашиглалтын төлөөх шийдлүүдийг дэмжих зорилготой платформ юм. Тус санаачилгаараа олон улсын эрдэмтэн судлаачид, төр, хувийн хэвшилтэй хамтран ажиллахыг зорьж байгаа ажээ.